Overblog Suivre ce blog
Editer l'article Administration Créer mon blog
5 juin 2011 7 05 /06 /juin /2011 22:07

ddk

Tahar Djaout

18 n yiseggasen, amzun d iḍelli !

 

image  

 

Ulamma 18 n yiseggasen i yezrin segmi iɣab Tahar Djaout, s kra n win i t-yesnen neɣ ahat win yeɣran agerruj-nni i d-yeǧǧa d awezɣi ad t-yettu, imi tikta-s mazal ttenfufudent di tmetti, tid ileddin allen i lɣaci amzun akken d tafat deg yifri. Tira-s, ama deg wungalen neɣ deg yiɣmisen anda yeqdec, tecba tayeggirt yuɣen deg yiḥerqan tefka-d ṣṣaba, tin akken ara yessuzfen tagut ɣef wallaɣen n yimeɣriyen. « les chercheurs d’os, Les vigiles d L’exproprié» d waṭas n wayen akk yura ad ilin d inagan fell-as belli d amusnaw yerran tamusni-s gar yifassen n yimdanen. Mmi-s n Wulxu, ilul ass n 11 deg yennayer 1954, yekcem s aɣerbaz di taddart-is almi d aseggas n 1964, imir yegguǧ ɣer tmanaɣt anda ikemmel leqraya. Deg 1970, imi lwelha-s terra ɣer tira, yewwi arraz ɣef yiwet n tullist iwumi isemma « Les insoumis » deg yiwet n temsizzelt taseklant. Segmi i d-yewwi turagt-is deg tusnakt deg useggas n 1976, yebda tira deg uɣmis n El Moudjahid. Ɣas ulamma d tusnakt i yeɣra, d tin i yeḍfer deg tesdawit, maca tira tezdeɣ allaɣ-is, ahat deg-s i yettaf ddwa.
S yin, yuɣal ɣer Algérie Actualités, anda iqeddec deg tesga n yidles. Din i ifures tagnit iwakken ad yerr tajmilt i waṭas n yimyura Izzayriyen yuɣalen di rrif. Yal tikkelt, aniwa iwumi ara yeldi tawwurt, ad d-yemmeslay fell-as, ad t-id-yessufeɣ seg tatut.
Abrid-is injer-it s yimru, yessa-t s tikta ireṣṣan ɣef tusna d tugdut. Acḥal d tafaska ideg d-yufrar am yitri ilmend n wayen yura, ama d ungal, d asefru neɣ d tullist.
Asmi yeldi unnar di 1988, yeslal-d yiwen n uɣmis iwumi isemma « Ruptures » tama n yimeddukal-is Metref akked Djaâd. Imi tallit-nni kkren-d yimesḥaf ad aɣ-beddlen tikli, ṭṭfen iberdan d leǧwameɛ, ɛebblen ad d-sersen buberrak ɣef yimdanen. Wa yeffer, wa yerwel, wa ɛerqent-as ! Imi yeggugem, ula d amɣar azemni ara nciwer iɣab seg lqum-a. Tahar Djaout, yegguma ad yeqbel ṭṭlam i d-yeɣlin deg uzal, neɣ ahat ad as-yemmel aniwa abrid ara yaɣ. Aɣmis-is yerra-t d lakul, deg-s i d-yesseftutus tikta, tid ara yesfaqen imdanen. Dɣa di lawan-nni i d-yenna :
Ma tessusmeḍ ad temteḍ
Ma tenniḍ-d ad temteḍ
Ihi, ini-d temteḍ
Awal-agi, icuba s ayen akken i d-yenna Lounis deg wawal-is :
Neɣ xtir eǧǧ-aɣ-d awal
Ara iɛicen deg umkan-ik
Segmi walan yeɛdawen n tudert acḥal i yezmer ad ten-yerreẓ s tikta d ṣṣwab, kkren ɣur-s s lǧehl d yiɣil. Uznen-as yiwen n yilemẓi, mazal ur temlal ara tmelɣiqt-is, yessureg-as kra n terṣaṣin ɣer uqerru-nni yeččuren d tamusni.
Ass-a, ad d-nemmekti kan d akken d ameɣnas amenzu i yeɣlin s ufus n rrebrab di 1993. S kra n win i t-yesnen, yeḥsa azal-is, yerra-as tajmilt akken yufa. Matoub, ad fell-as yeɛfu yerḥem, yerra-as yiwet n tejmilt anda yemmeslay i Kenza, taqcict tamaẓuẓt n Djaout, anda yenna :
A Kenza yelli ur ttru ara
D iseflan neɣli ɣef Lezzayer uzekka.
D acu kan, awi yufan idammen n wid yeɣlin akka d iseflan ur ttruḥun kan akka, imi ilaq abrid i d-nejren ad t-neḍfer. Akka i d tajmilt i ttrajun seg-neɣ. Am wakken i as-yenna Didouche : « Ma neɣli, ḥader-t ɣef wayen iɣef i d-nekker.»

 

Sylia. M

Partager cet article

Repost 0

commentaires

Présentation

  • : La confédération des Iflisen Umellil
  • : Un des objectifs est de reconstituer la grande confédération qui regroupait les 14 aarchs des Iflisen Umellil avant la colonisation française. Le but est de rétablir les liens interrompus et de promouvoir la solidarité inter-arche. Nous visons également à consolider les liens entre la diaspora et leur région d'origine. Réecrire l'histoire des Iflisen et préserver leur patrimoine matériel et immatériel .
  • Contact

Recherche

Liens