DDK
Tebda yakan tegrewla n wayetmaten ilibiyen tettak-d ttemṛa-s, imi γas ma Lkulunal Mεemmeṛ Lqeddafi yerra-ten γer tεercit i wazal n waṭas n yiseggasen, yessaweḍ ugdud tikelt-a ibeyyen-d tadukli-s seg usammar γer umalu. Di lawan ideg d-ilul di Benghazi usqamu uεḍil n tegrewla n Libya, imir kan nnejmaεen lεuqqal n temnaḍt n n Nalut i d-yezgan deg Udrar n Nefusa, ssufγen-d yiwen n wulγu ideg d-sbegnen asaned-nsen i usqamu-ya. I yefkan lwelha, mi d-γṛan lεuqal n Nefusa alγu-nsen : Yeγra-t-id qbel yiwen n umγar s tutlayt taεṛabt, mi yekfa iεawed-as-d taγuṛi yiwen n yilemẓi i yellan rrif-is s tmaziγt takadimit. Γas ma imezdaγ i iṣewṛen lejmaε εujlen grent γer lantirnet, yerna lawan-nni, (ass n 27 di furar) tilibizyu n El Djazira akka i terγa ansi ara d-tawi isallen yerzan asaned n temnaḍin n umalu i usqamu-ya i d-ilulen deg usammar, maca ur d-skin ara anejmuε-a armi i εeddan fell-as sin n wussan, yerna tesεedda-d deg-s amur-nni kan ideg d-mmeslayen s taεrabt. Aya mebla ccek yessebgen-d i tikelt-nniḍen tigejdit n tilibizyu-ya i yettwabnan γef tidyulujit taεerbuslamit γas ma yella wanda i tuklal acekker imi d nettat i irufqen igrewliwen seg wasmi i bdant tmesbaniyin timezwuru. I win yebγan ad iwali ttṣaweṛ-a n lvidyu, atan uzday : http://www.youtube.com/watch?v=FiQnfAkaDGI