Overblog Suivre ce blog
Editer l'article Administration Créer mon blog
23 janvier 2012 1 23 /01 /janvier /2012 00:18

source: DDK

 

 

Azem

Par

 

 

Sliman Σazem d amedyaz, d anaẓur , d tigejdit n ccna n teqbaylit. Ilul ass n 19 ctember 1918 di tmurt n leqbayel, taddart Agni-Geɣran, Lɛerc n At-Sedqa, deg tama n Yiwaḍiyen. D mmi-s n Leɛmara d Yamina, yesεa 03 watmaten-is Bujemɛa, Waɛli d Ali, akk d 02 n tyessetmatin, Ḥǧila d Wardiya.
Yella d mmi-s n ufellaḥ am netta am leqbayel n lawan-nni ; deg uɣerbaz ur izad ara, yella d alemmas. Aqerru-is iwehha sanda nniḍen. Si temẓi, Sliman Σazem yeḥmel ad yecnu γas akken tallit-nni d lεib win icennun.Yella d win i iḥemlen aṭas timucuha n umaru afransis Jean de La Fontaine. Dɣa, annect-a, yeǧǧa-d later deg umecwar-ines n tẓuri d ccna, imi deg tezlatin-is yessenṭṭaq-d aṭas n yiɣersiwen.
Tamedyazt n Sliman Σazem d tazedgant u d talqayant, yeṭṭef-d afus i tmedyazt taqbaylit di tsuta yezrin, yeṣṣaweḍ-itt-id i tsutiwin i d-iteddun, yerna deg ubrid hrawen. Sliman Σazem yeffeɣ taddart-is meẓẓi. Yesɛa 11 n yiseggasen di lɛemr-is asmi i iruḥ ɣer Lezzayer tamaneɣt iwakken ad yexdem ɣer iṛumyen deg tama n Sṭawali. Asmi yewweḍ 19 n yiseggasen yezger agemmaḍ ɣer Fransa. Iṛuḥ ɣer temdint n Leɣwi (Longwy) anda yexdem deg yiwet n lluzin, uqbel ad as-d-ssiwlen ad yels, akken ad yettekki deg ṭrad-nni iwumi qqaren Issoudun. Deg 1940, yeffeɣ-d seg lɛesker, yeffeɣ tamdint n Leɣwi, yekcem tayeḍ : Paris anda i ixeddem dinna deg umitṛu sdaxel uderbuz (akken yeqqar deg yiwet n tezlit-ines). Sin yiseggasen mbeɛd, wwin-t lɛesker n Lalman ɣer Rhénanie deg tama n umalu n Lalman, ur d-yeffiɣ armi d asmi tewwi Fransa tilelli-s, deg 1945. Kra n yiseggasen syin, yeṭṭef yiwet n lqahwa. Dɣa din yella icennu i yiminigen am netta. Taɣect-is tamezwarut A Muḥ a Muḥ yessuffeɣ-itt-id ɣef yinig. D tizlit i d-yeldin abrid i tamudi n 50 n yiseggasen n ccna igerzen.Asmi i tewwi Lezzayer timunent deg useggas n 1962, Sliman Σazem ur yeṭṭif ara imi-is ɣef wayen i iḍerrun deg tmurt. Dɣa ilmend n waya, gedlen tuɣac-is ur d-ttɛeddint ara deg Rradyu n teqbaylit seg useggas n 1967 ar 1988. Sliman Σazem d anagi ɣef tallit ideg yedder, d anagi ɣef ddunit ur nban s anda i tetteddu, akken yeqqar deg yimeslayen-is : Llah ɣaleb, kulci yeqleb, Zzman tura yexxerweḍ, atg. Tuɣac-is d tugniwin n temetti i d-yesnuqul.
yemmut ass n28 yennayer 1983 di Moissac tamurt n Fransa.

Islam Bessaci

 

 

 

Tuttra tagujilit

Par

 

Mi kfant tuzmiwin, mi yemmundel ṣṣwab, mi yecceg lebɣi , mi yeɛreq ubrid, mi teskucber tidmi ɣef yiman-is, yettɣimi-d umraḥ d lxali. Allen yettḥekkiren nnig n lemwaji n yilem,nnig n usigna n ṭṭlam, nnig n tneẓrufin yesburren tugdi, zṛant ɣef wacu i ttnadint. Iɣemɣumen yedlen azenẓrayen n yiṭij , duleqrar ad fsin, imi tafat d awezɣi a tt-yekbel ufus. Taɣect, urǧin yefkan tamugent i tsusmi, xas tebbeḥbeḥ, tessawel i win izemren ad iniwel imeslayen yellan d dwa ḥellu i wul inedfen deg wakken hamjen deg-s yisɣan yesmenyafen amurḍus ɣef lbenna n tiẓeḍt . Ixef yunagen ɣer tmurt deg urǧin yemmut ccna, tesla i tasa yezzan mi tcewweq tenna :
Slimane Azem anwa i k-id-yerran
Ma ad twaliḍ zman
Ma ad ak- ɣaḍen widen yettrun
Ad aɣ- d- tecnuḍ ɣef wayen iɛeddan
Akked wayen yellan
D wayen i la d-iteddun
Ayen i aɣ-d –ǧǧan yimawlen
S yiseɣ d leḥsan
Tura kkren-d widen i t-yettun
Smirjiḥen yisefra yettleqqimen tudert ɣef ufruk n timurṣaḍ. imeɛfan zizren amus ɣef wakal deg i d- yemɣi acḥal d imɣi n lewqam. Yendekwal ṛruḥ ɣef tizzelgi yellan , yufa ziɣ leqmen ɣef tejra n leḥlu tikerkas, widen iwumi yecceḍ laṣel. Yeɣli sqef yeddurin axxam deg nnejmaɛent tezlatin tiden i nḥemmel. Nedqen yenzizen ɣef wudem n yimenduyar yettawin ṣda n yimeddaḥen, widen yettbedden tawwurt tawwurt, amer ayen akken nwan n tidet ad tt-ṣṣiwḍen. Yeɣli-d wxeḍ ɣef tmurt, nufa deg yirebbi n wayen nettɛuzzu i d -yefrurex lɛar, armi yuɣal kennu d azamul n tiḥerci. Teqfer tmusni deg wallaɣen n widen yerẓan tisirt n teqbaylit di leryac. Ixef yunagen ɣer yigemmaḍ anda sser werǧin yeɣli wazal-is, anda leḥya werǧin yebbelkem leqder-is, yufa yiman yennuɣnin , xas ma taɣect-is tebbeḥbeḥ, mazal tettnamar iɣulad ireglen abrid i tmenna :
Acḥal n widak yerfan
Am widak yenfan
D imeɣban di tmurt-nsen
Xedmen armi dayen ḥfan
Ayen i d-snulfan
Yuɣal-d d aɛdaw-nsen
Am win yettrebbin
Izerman
S lxir d laman
Mi meqrit ar d ad t-qsen
Yuli-d uɣebaṛ n tatut ɣef udlis n tmusni . Tessa takka ɣef wudem n yizmamen yeččuren d tizumna. Annar yuɣal d tazniqt deg yettlaweḥ waḍu n uɣurar. Yekkaw lmidad di tedwat. Yeḥzen leqlam, yeɣli si gar yiḍudan, yewwet gursel. Timucuha sebkent deg yikufan n meɣrud. Isefra skucebren ɣef yiles celḥen lemwas n ustehzi. Ulamma lweɛd iteqqes , taɣect xas tebbeḥbeḥ tsuɣ lhejna yellan :
Aqli ttawiɣ-d isefra
Terra-yi tmara
D lemḥayen iten- id-yeǧǧan
Si tmeddit ɣer tafrara
Ur gganeɣ ara
Am win iwumi ɛejben yitran
Ixef-iw yurǧan taggara
Mačci kan d kra
Ayen yezṛa d wayen i t-yurǧan
Dderz yettawin lexyal n yiḍelli yexmet deffir yir idurna. Abbu i d- yessuḥeb wass-a, d win yerran amendil n tidderɣelt ɣef wallen. Siwa leɛyub i d-tettencad tmuɣli ikecmen deg wurar n yir lemri. Yekna uɛrur i lbaṭel, yufa lebɣi-s ɣer-s armi yuɣal lehlak d win icuban ḥellu, armi ula d axbac yuɣal ineggi d leḥnana. Iselman iweqɛen deg yir ticerket, simmal ttembiwilen simmal tettẓeyyir tyersi ɣef yiraw-nsen. Yenqedwa wawal deg yir amdun, sellaw lmenṭeq s wacu i d-yegla :
Ẓriɣ amur-iw yenza
Dayen i d-tefka twenza
Ur ẓriɣ anwi iyi- ɛaqben
Reqmen-t yakk s leḥzaza
Mi teqden yezza
S usefru i t-zenzen
D widak terriḍ d imenza
A bab n lɛezza
Ziɣ s ẓẓur i tt-cehhiden
Igudar ggunin tamurt. Yejla lbaz, teqqumec tninna am tadla i yir lawan. Zzman yeḍṣa ɣef widen yettun tansa n timadit. Di tigzirin n ulejlej, tennuɣ targit akked tilawt. Izumal n yinuɣniyen i d- yemmaren ur d-ddin ara di sfina n ugacur. Lqeḍ yellan zik-nni yeddem-it yir uqamum armi tuɣal teɣribt teɛreq nnig n lkanun. Amek ara teḍru d win iteddun di ṭṭlam i d- tefka tafat n yir taṣebḥit akken ad yedlu ɣef uɣbalu n tidet ? Tidderɣelt mačči d yiwen i d udem-is :
Tikwal amzun d aderɣal
Ɛereqen- iyi lecɣal
Am win yettargun lewqat
Aferṭeṭṭu d amellal
Yettruḥ yettuɣal
Yedewwir ɣef lembat
Sliɣ-as mi d- yessawel
Ugadeɣ ad imal
Ad yerɣ ur tettban tafat
Win yewten deg-neɣ la smaḥ. Win yenwan anṣib deg yixmir mačči d izli i tebɛed targit-is. Win yestenwan deg wayen i d- yenna wawal meɛdur ma yekcem di tmeḍlas. Agens ur yesliɣ alamma tella temlilit. Ammus ur yekkis alamma uzlen waman. Ul ur yettidir alamma yekseb tayri. Lḥir ur ifennu alamma d- tewweḍ tmugent. Lewham ur yettiwzil alamma d- yewweḍ ttbut. Nnig n tɣaltin yesmirǧiḥ wawal acqiq akken ad yini : « Sliman azem wi ik d- yerran ? ». Nnig n lexwaṭer yessan asḥissef deg wulawen-nneɣ, yezzi-d ṣṣut neccedha, izger-d lebrur, lebḥur, idurar, swaḥel, ṣhari…akken xas taɣect tebbeḥbeh akken ad yessefru ɣef wayen ttun widen iɛebden leɣrur :
Yebḍa yakk ẓẓehr-iw yecbek
Yeqḍeɛ aḥerrek
Sanga iruḥ mačči ɣer din
Lukan d lehlak i yehlek
Ad as- id- nadiɣ amek
Ad as- d- afeɣ ddwa i umuḍin
Ziɣen yeḍha-d yettumlek
Imi kan yebrek
Waqila izedeɣ-it wis sin

Ait Slimane Hamid

Partager cet article

Repost 0
Published by iflisen - dans Exil
commenter cet article

commentaires

Présentation

  • : La confédération des Iflisen Umellil
  • : Un des objectifs est de reconstituer la grande confédération qui regroupait les 14 aarchs des Iflisen Umellil avant la colonisation française. Le but est de rétablir les liens interrompus et de promouvoir la solidarité inter-arche. Nous visons également à consolider les liens entre la diaspora et leur région d'origine. Réecrire l'histoire des Iflisen et préserver leur patrimoine matériel et immatériel .
  • Contact

Recherche

Liens