Overblog Suivre ce blog
Editer l'article Administration Créer mon blog
18 octobre 2009 7 18 /10 /octobre /2009 20:16
ddk 19 octobre 2009

Adiwenni d Mass Ali Bedrici, lwali n Bgayet

« Tikelt tamezwarut anda ahil n lwilaya yella-d s umcawar

n tedbelt akked wufrinen. Di taggara, ahil-agi ur yezmir ad yefru

akk timsal, lameɛna ad iwenneɛ mliḥ liḥala n wilaya. »

DDK : Bgayet, am twilayin n tmurt Leqbayel, qqiment deffir tiyaḍ deg wayen yerzan anegmu. Amek i tufim lwilaya n Bgayet asmi i d-tusim deg yunyu 2008 ?

Lwali : Amek tella lwilaya n Bgayet di 2008 ? Am wakken i tt-id-yesken usefqed i d-yessufeɣ usqamu-nni i nessebded di lawan-nni : d lwilaya anda iberdan ttwaɣen aṭas, lgaz n temdint ixus nezzeh, aḥric n tezmer yettuɣal ɣer deffir, tawennaḍt tettwaɣ, atg. Deg waṭas n yiḥricen, d lwilaya i yesɛan leɛḍil deg unegmu. Γef lsas n usefqed-agi i nexdem, nsexxer ahil n wayen ara yettwaxedmen di 5 yiseggasen i d-iteddun. Zemreɣ ad d-fkeɣ kra lemtul : aɣbel n lgaz, iberdan, aman, lmersa (le port), asafag (l’aéroport), anegmu n tudrin, atg. Ahil atan tura gar yifassen n lḥukuma : am wahil i 5 yiseggasen (le plan quinquennal), am wahil amazzay (le plan special).  Ad d-iniɣ daɣen d tikelt tamezwarut anda ahil n lwilaya yella-d s umcawar n tedbelt (l’administration) akked wufrinen (les élus). Di taggara, ahil-agi ur yezmir ad yefru akk timsal, lameɛna ad iwenneɛ mliḥ liḥala n lwilaya.

DDK : Seg wasmi i d-tusim, terzim ɣer waṭas n tɣiwanin d tudrin n twilayt n Bgayet, ahat d kečč i d amezwaru i igan aya seg lwaliyat i yellan da. Amek i tufim Bgayet deg unnar ?

Lwali : Amek i awen-d-nniɣ lwilaya, aken i tt-walaɣ deg unnar, tesɛa aṭas lexsas. Lameɛna, s lxedma, s umcawar, nezmer ad nwenneɛ liḥala, asurif asurif. Seg yidis-nniḍen, llan kra yiḥricen deg lwilaya n Bgayet sefraḥen am uḥric n senɛa imi ɣur-s l’agro-alimentaire yelha, ɣur-s tasdawit igerzen, lmersa tis snat di tmurt n Lezzayer, ...

DDK : Tewḍem-d ɣer Bgayet, tamuɣli tamezwarut i d-tgim : “Bgayet tewsex”. Dɣa, aṭas lḥemlat n usizdeg i d-yellan tugart deg temdint n Bgayet. D lḥemlat n usizdeg i ilaqen neɣ d ayen-nniḍen ?

Lwali : Asizdeg mačči d lḥemlat – tigi ttilint d zyada – asizdeg n temdinin dayen yeɛnan taɣiwant. D cɣel n yal ass, ssbeḥ, tameddit u deg yiḍ. Neqqar-asen i yemḍebbren n tɣiwant n Bgayet akken ad xedmen ayen iwumi zemren akken ad tizdig temdint. Qqaren-d xussen ttawil, qqaren-d diɣ atan ad aɣen aṭas wallalen akken ad sizdigen tamdint. Seg tama-nniḍen, asizdeg dayen yeɛnan imezdaɣ daɣen, tettwalim ayen iḍerrun, ilaq imezdaɣ ad kkin deg usizdig.

DDK : I temsalt n zzubiya n Bulimaṭ d tin n CET ajdid.

Ma d le CET n Bgayet, dayen yufa tifrat. Wid i teɛna temsalt msefhamen ɣef wakal anda ara yili. Amkan-agi yeqreb s amkan amezwaru, di tɣiwant n Bgayet.

DDK : Aṭas wahilen n tmezduɣin i yebdan nnig 5 yiseggasen aya am AADL n Buyblaṭen neɣ win n Brandy, ayɣer ur fukken ara ?

Lwali : Timezduɣin n Brandy akked Buyeblaṭen ( AADL) ɣursent leɛḍil imi leɛqud n lxedma llan akked d “Khalifa”. Asmi tefsex carika-ya, yiwen ur yebɣi ad yawi acanṭyi-agi, ttagaden merra les ADO, ulac win i d-yettarran fell-asen, armi d taggara-ayi tura. Sin n yicanṭiyen-agi, atan ad fakken sya ɣer dujenber 2009.

DDK : Llant aṭas, daɣen, lḥumat n tmezduɣin i ifukken neɣ ara ifakken am Tala-Weryan, Sidi-Ɛli-Lebḥer. Ayen i yeṭṭafaren lḥumat-a, ixuss am yiɣerbazen, tizeɣwin n usujji, atg.

Lwali : Lḥuma am Tala-Weryan, tusa-d di temdint, teqreb ar lakul, lbusṭa, axxam n seḥḥa, atg. Lḥuma ibeɛden d tin n Sidi-Ali-Lebḥer. Din, ad nebdnu : aɣerbaz s 12 tzeɣwin, sin n yiɣerbazen ilemmassen yiwen yebda lebni-s wayeḍ atan ad d-yeffeɣ en appel d’offres, tasnawit, annar i turart, lkumisariya n lḥuma, lǧameɛ n tẓallit, 500 tzeɣwin i leqdic. Akken daɣen ad tili tazeqqa n tezmert (une polyclinique), tamkarḍit, d la crèche. Sidi-Ali-Lebḥer deg-s 4000 tmezduɣin – d tamdint s wazal 20.000 yimezdaɣ, d tidet, ilaq-as aṭas n ttawilat.

DDK : Iberdan iɣelnawen : ama d win yettawin ɣer Tiz-Wezzu seg Uẓeffun neɣ seg Udekkar, ama d win yettawin ɣer Sṭif d Jijel, ama d win yettawin ɣer Tubiret seg Uqbu ; hudden, ččuren d iɣwiren akked les dos d’âne, melmi ara d-yettwaddem rray ad ttwaɛiwden ?

Lwali : Iberdan yettwaɣen aṭas, d RN12 lǧiha n Tizi-Wezzu, RN24 ɣer Uẓeffun, la RN75 ɣer Kendira. Isyaxen imeqqranen, tella-d deg-sen lxedma : 3 yimukan n la RN12, 6 yimukan n la RN24 ; ma yella anda i yella usyax ameqqran, ilaq-as tazrawt (étude). Bnadem ad d-yini tidet, iberdan n lwilaya n Bgayet ttwaɣen aṭas, ama d iɣelnawen, ama wid n lwilya ama wid n tɣiwanin. Zdat liḥala iweɛren am tagi, tanemhalt n les T.P tesker ahil ara yettwaxedmen, asurif asurif.

Ayen ifuken 2009 : 110km n yiberdan n tɣiwanin, 32km n yiberdan n lwilaya, 98km yiberdan iɣelnawen, 3 tqenṭyar meqqren. Ma dayen ideg tebda lxedma di 2009, 180km n yiberdan n tɣiwanin, 240km yiberdan n lwilaya, 30km n yiberdan iɣelnawen. Ur tettuɣ ara abrid aɣelnaw 43 ideg tebda lxedma n les tunnels. Twalam lmejhud, neẓra belli mazal lmejhud ameqqran sya ɣer zdat, ur yezmir yiwen ad iɛawed akk iberdan deg yiwet n tikelt, lxedma ad tkemmel kra kra alama wennɛen akka iberdan. Ma d abrid ameqqran gar Bgayet akked l’autoroute est-ouest : atan yeffeɣ-d l’appel d’offre i l’étude.

DDK : Yella umaynut, aseggas-a, deg wayen yerzan anekcum, ama ɣer tesdawit ama ɣer yiɣerbazen. I CHU, anda i yewweḍ wahil-is ?

Lwali : CHU n Bgayet, yella d targit deg yiqerra n yimezdaɣ akked yimḍebbren, atan ass-a yuɣal tidet. Seg unekcum n useggas 2009-2010, ad yili CHU deg Bgayet. Ma d anemhal n tterbga, ata yusa-d.

DDK : Deg wayen yerzan tafellaḥt, tamuɣli ur d-telli ɣer wayen yellan mucaɛen deg Bgayet am zzit, tazart, tamemt. D acu ilaqen akken ad tbeddel tmuɣli sɣur srabes i terza temsalt ?

Lwali : Aseggas 2008-2009, lwilaya n Bagayet tekkes-d 19 imelyan n litrat n zzit, deg yiseggasen iɛeddan 7 imelyan kan. Lɣella n tamemt tewweḍ ɣer 120 yiqenṭaren i useggas, meɛna seg 45.000 teɣrasin di 2000, llant ala 5000 i d-yettakken s tidet. Ma d tazart, ilaq as lmejhud : tura 13.000 ihegtaren i d-yefkan 160.000 yiqenṭaren n tazart di 2008. Dewla tettɛawan tafellaḥt s ubrid n FNDA.

DDK : Ad tuɣal la zone industruelle n Bgayet ɣer Uqbu d Leqser. Amḍiq-is yenza akken ad bnun timezduɣin. Aya ad d-yernu imezdaɣ, ad d-yernu afus i lxedma, meɛna axeddim ad yenɣes. Amek ara tqabel twilayt aɣilif-a ?

Lwali : Tuɣalin n la zone industrielle n Bgayet s anda-nniḍen mačči i uzekka. D lamer iwmi ilaq uxemmem aṭas axaṭer mačči dayen isehlen. Nekni ur nebɣi ad nesruḥ axeddim, labeɛda di teswiɛt-agi anda txus lxedma. Ihi aya mačči d lḥaǧa yezwaren.

DDK : Aseggas-a, tefkim azal d ameqqran i lemqan n Ccix Aḥeddad. Meɛna akken i nettwali kra ur d-yettɣim i lebda. Anda yewweḍ uweɛɛed-nni n le musée ?

Lwali : Le musé n ccix Aḥeddad, ilaq-as asenfar (un projet), imi ilaq lebni iwakken ad yili dayen ifazen am lemqam n ccix yakan. Nufa akal di Sedduq-Ufella, u ad nebnu axxam i le musé.

DDK : I lqelɛa n At Ɛebbas ?

Lwali : Ma d lqelɛa Nat Ɛebbas, nezwar deg ujerreḍ inscription à l’inventaire du patrimoine n lemqamat yellen din s usewjed n usafsar akken ad nebnu lemqam n ccix Lmeqrani, ad as-nwenneɛ lǧameɛ Usanoun, lxezna n lbaruḍ, axxam n Bumezrag, atg. Asafar-agi nefka-t i lḥukuma akken ad fken taadrit i ilaqen.

DDK : Deg yibrir 2001, lwilaya tesnulfa-d asqamu n yidles n twilayt n Bgayet s l’arrêté 424/01 n 14 ibrir 2001. Ar ass-a, ur d-yexdim kra, yerna kečč s timmad-ik tḥebbseḍ. Ma d idles yuɣal d aẓawali. Amek ?

Lwali : Aḥbas n usqamu n tmeɣriwin n lwilaya (Comité des fêtes de la wilaya de Béjaia) ur yesgujel ara idles. Idles ilaq ad yuɣal ɣer tenmehla-ines, tin n yidles. Ma d idles, nwiɣ-as aṭas i yettwaxdmen : timesbaniyin n useggas, timesbaniyin di ramḍan akked d wussan n usmekti, tullya uxxam n umezgun le TRB rnu-yas qrib la cinémathèque, ajerred n yal later i tesɛa lwilaya n bgayet i tikelt tamenzut (inscription à l’inventaire du patrimoine de tous les sites historiques et culturel), asebded n temzizelt n yidles di tɣiwanin deg tmedyazt, amzgun, bla ma nettu tafaska n ccna n teqbaylit. Aya d lemtul i d-yeskanen belli nefka azal i yidles.

Yerna idles deg wul. Ula d nekk sarameɣ ad d-afeɣ kra tallit akken ad d-aruɣ taktabt.

 

DDK : Annar n tmazɣa yedli deg tuber ideg nella. Ur twalam, ɛni, ilaq ad yimɣur mačči ad yettwareqqeɛ ?

Lwali : Annar n tmazɣa i yellan deg temdint n Bgayet, twalam yeldi. Annar-agi ilaq di tazwara ad yettwareqqeɛ, nezwar deg wayen iɛejlen, atan tura annar yelha i wurar. Asurif wis sin, d tafat, qrib ad bdun lecɣal. Ma d asemɣer, anda ar yimɣur unnar-agi, ulac anda; zzin-as lbaṭimat. Atan di tlemast n temdint. Tifrat ad tili s lebni n unnar ajdid n 45.000 yimukan – nessuter di lḥukuma ad tjerreḍ di le plan spécial – inchallah ad yili am wass-a.

DDK : Asteqsi aneggaru, ad d-yawi ɣef yidles amaziɣ. Amek i tettwaliḍ asnerni n tmaziɣt ? D acu ara d-tinim daɣen ɣef uɣmis s tmaziɣt ?

Lwali : Tamaziɣt d tameslayt taɣelnawt, idles n tmaziɣt yersa di tmurt n Lezzayer si zik-nni. Lḥemdullah, ass-a llant radyuwat, tilibzyu, ijernanen s tmaziɣt, aṭas i yettarun tiktabin, isefra, amezgun s tutlayt-agi i ikecmen daɣen di les technologies timaynutin am les CD, DVD, internet, atg. Akken i ttwaliɣ, idles amaziɣ yufa amkan i as-ilaqen di tmurt-nneɣ, akka ara yeddu ɣer zdat.

Aɣmis s tmaziɣt dayen igerzen, sarameɣ ad yennerni, ad teqqaren aṭas medden.

Dj. Ikhloufi / Mohand Ait Ighil

Partager cet article

Repost 0
Published by iflisen - dans Bgayet-Jijel-Setif
commenter cet article

commentaires

Présentation

  • : La confédération des Iflisen Umellil
  • : Un des objectifs est de reconstituer la grande confédération qui regroupait les 14 aarchs des Iflisen Umellil avant la colonisation française. Le but est de rétablir les liens interrompus et de promouvoir la solidarité inter-arche. Nous visons également à consolider les liens entre la diaspora et leur région d'origine. Réecrire l'histoire des Iflisen et préserver leur patrimoine matériel et immatériel .
  • Contact

Recherche

Liens