Overblog Suivre ce blog
Editer l'article Administration Créer mon blog
7 août 2011 7 07 /08 /août /2011 22:20

 

DDK

 

Imceddalen : Lɣiḍ n yicimuṛen

Taɣiwant n M’chedallah tettidir ussan-a deg yiwet n lḥila n lɣiḍ d lḥers i yessawḍen ilmeẓyen ur nxeddem ara almi medlen tiwwura n uxxam n daira, tid n srabes n uxeddim (ALEM) d sonelgaz. tiwḍin ɣer rray yecban wa deffir-s yiwet n ssebba i yesserfan ilmeẓyen mačči d kra. Ihi, taluft tebda-d mi akken yiwet n tkebbanit n lɛassa teḥwaǧ ad tessexdem azal n 60 n yilmeẓyen yessawḍen di leqraya s aswir wis-sin n tesnawit. Dinna dɣa i yekker wah ruḥu, imi aṭas n wid yebɣan ad xedmen maca ur ṣṣawḍen ara ɣer ccerṭ-agi n tkebbanit. D ayen i yeǧǧan ihi ilmeẓyen-a sxedmen iɣil s umdal n tebbura n srabes yeccerken di cɣel-a.
Iwakken ad d-afen tifrat i taluft yecban ta, yettenfufuden yal ass, takebbanit tgegzem-itt di rray iwakken ad tejbed asuter-agi-ines n yiɛessasen. D ayen i yeswehmen imdanen i yerǧan ad yettwakkes ccerṭ-a n uswir n leqraya.
Ɣef leḥsab n yisallen i aɣ-d-yeɛḍen, rray yecban wa d win ara yernun zzit i tmes mačči d lehna ara d-isers. D acu kan, mazal kra n yimdanen i yettnadin tifrat, ahat ad d-rren i teɣri n yilmeẓyen-agi.

S. M

 

Tubiret : Leɣla n yisufar n wučči

 

 

Am yal remḍan, tthabin yimdanen ad aɣen abrid n ssuq. Isufar n wučči ssemɣayen-d tiferrawin, tikwal ttawḍen s anda ur asen-yettizmir ara umdan ad ten-id-yaɣ.
Ulamma deg wussan imezwura n waggur-a ur d-iban ara leɣla s wudem iṣeḥḥan, maca taggara n ddurt tuli s waṭas ssuma n waṭas n yisufar. Di ssuq n temdint n Tubiret, win akken yettwasnen yakan s tlilin n yal taɣawsa yernu s ssuma yettwaqbalen ibeddel ṣṣifa-s tikkelt-a. Amek ihi, kilu n lqares yewweḍ ɣer 300 n yidinaren, lbaṭṭa 45 n yidinaren, talubyant 120 n yidinaren, ẓrudiya 50 n yidinaren. Ayen yessewhamen daɣ, mi ara tafeḍ ayen i d-yettasen seg tmura n lberrani am lbanan s ssuma n 120 n yidinaren, ttmeṛ i d-tettak tmurt nneɣ s 450 n yidinaren.

S. M

 

 

 

Tizi Wezzu : gar loto d domino

Wid yennumen ttruḥun, iseggasen iεeddan, di remḍan γer temdint n Tizi Wezzu ad afen tbeddel mačči d izli. Iberdan yettilin ttaččaren s ṭṭunubilat d yimdanen uγalen qrib d ilmawen. Seg wassmi i yettwakkes uznuzu deg yiberdan d usufeγ n ttawilat n usiweḍ (ifurguyen) γer berra n temdint, imesdurar uγalen ur sṭuqquten ara tikli γer temdint. Xas akken tuγal-d lhiba tamdint : ulac lxuf, tenqes tukerḍa, tikli di liser… meεna llan wid yettwalin aya s yir tamuγli ladγa wid-nni yesnuzun lxeḍra d lfakya. Yal ass ara d-ilalen, ad d-yili ujdid seg lğiha-nsen imi tteεraḍen yal tikkelt ad d-uγalen γer yimekwan anda ttilin zik, acu kan imḍebbren n lwilaya ur ten-ttağğan ara. « Zik di remḍan ur tezmireḍ ara ad tembiwleḍ di temdint : ččuren yiberdan d sselεa. Ad tafeḍ ayen tebγiḍ. Tura ula d leḥcic n ccerba yeγba. » Akka i tesḥassef yiwet n tmeṭṭut. « Akka i tella temdint di leftur-nni, ur yili d acu ibeddlen. Yella kan ciṭ-nni n lxilaf deg yiḍ imi d-yettili ccna deg uxxam n yidles Mulud Mεemmri. » Ikemmel yenna yiwen umezdaγ n temdint.
   Ma d remḍan di tudrin n leqbayel yecba tayaziḍt-nni n At Belqasem ‘’yiwen n ubrid i tessen.’’ Bexlaf wid yettruḥun γer zyara n yimawlan neγ γer uḥewwes, amur ameqqran ttawin abrid n lqahwa neγ n lğameε. Wid yesεan zher zemren ad d-afen amkan i kra lweqt γer domino uqbel ad tebdu loto. Iseggasen-agi ineggura, ḍewren-tt akk iqahwajiyen γer loto, faqen tesεa tadrimt ugar ayen-nniḍen. Ihi akka aggur kamel, gar uxxam d lqahwa. ‘’Remḍan yuγal d lεada mačči d lεibada’’ i aγ-d-yenna Meqqran.

Hocine. M

 

Ulamma tɣabem, mazal-iken deg wulawen.

Tawacult n tɣamsa n Tubiret yeɣli-d fell-as leḥzen mi akken yewweḍ leɛfu n Rebbi yiwen seg yiɛeggalen-is. Wagi d Nacer HANICHE, i teccelqef tmettant di lɛemr-is 48 n yiseggasen. Deg yiseggasen n 80, mi yella yakan yeqqar deg tesnawit Mira n Tubiret, Nacer yebda yesnunnuc akka d wakka s ayen icudden ɣer yidles d tutlayt-is tayemmat. Ɣas ulamma d tallit n lḥers,yegguma ad yefcel. Mi yewweḍ ɣer tesdawit n Tizi Ouzou, yufa annar ideg ara yeqdec. Din, yesdukkel leqraya d umennuɣ. Kra n yiseggasen akka, yuɣal d aselmad n “les sciences physiques” di tesnawit. S kra n wanda i d-iɛedda, ala lxir i ttmeslayen fell-as, imi inelmaden-is wwin seg-s agerruj. Ur yeqqim ara kan akka deg uselmed, imi amennuɣ i yebda seg temẓi-s ikemmel-as deg unnar n tɣamsa, deg “La Tribune”. Tira-s tuɣ abrid n tidet d uḥareb ɣef yizerfan n umdan. Imi anda yella lbaṭel, ur t-yekbil ara. Ula d tamehla n usegmi n Tubiret ad d-yeǧǧ deg-s ilem ur nettwaɛmer, imi dinna i yella ixeddem taggara-agi. Ass-a, Nacer iruḥ, yeǧǧa-d deffir-s tameṭṭut d tlata n yigerdan, akked ṣṣifat n tirrugza, tagmat d nnif ara d-icehden fell-as.   

17 n yiseggasen- aya amzun d iḍelli ! ulamma tɣabeḍ, maca mazal-ik. Yak yella deg wawal: Yella lbeɛḍ yella, ulac-it, yella wayeḍ ulac-it, yella. Kečč, seg wid yellan, acku tteswira-k tezdeɣ gar wallen. 
Ay aḥbib n tegrawla, akken i yecna fell-ak win akken i n-yernan ɣur-k, turiḍ amecwar n tudert-ik s yisekkilen n wureɣ. Ul-nni-inek iḥebsen, yeččur d lehmum i izedɣen tamurt, tin akken i tessarmeḍ ad tfeǧǧeǧ. Tuɣeḍ abrid n umennuɣ ɣef tlelli, izerfan d tidet iwakken azzayri ad yezdi lqed-is di tmurt-is. Tilufa ṭṭuqtent, ta tcerreq, ta tɣerreb, kečč tettnadiḍ anda texreb almi i tɛebbaḍ i wul-ik ayen iwumi ur yezmir ara.
Ass-a, tasaft n Ugemmun ad ak-terr tajmilt, tin akken i tuklaleḍ, imi yal aseggas tawacult-ik d leḥbab-ik ttadden-d s aẓekka-s, iwakken tasuta ara d-yeflalin ad tkemmel deg ubrid i d-tnejreḍ.
Telliḍ di lmendad i waṭas n yineɣmasen, telliḍ allen i wacḥal d ilemẓi, tezgiḍ d lakul i kra n win akk zedɣent tismin ɣer tugdut. Teddreḍ d amagday, temmuteḍ d agrawliw !

Aɣmis

Partager cet article

Repost 0
Published by iflisen - dans Tamazight tatrart
commenter cet article

commentaires

Présentation

  • : La confédération des Iflisen Umellil
  • : Un des objectifs est de reconstituer la grande confédération qui regroupait les 14 aarchs des Iflisen Umellil avant la colonisation française. Le but est de rétablir les liens interrompus et de promouvoir la solidarité inter-arche. Nous visons également à consolider les liens entre la diaspora et leur région d'origine. Réecrire l'histoire des Iflisen et préserver leur patrimoine matériel et immatériel .
  • Contact

Recherche

Liens