Taggara n ddurt yezrin, yerza-d Ahmed Ouyahia ɣer Tubiret. Tewwi-t-id lḥemla n lbuiṭ: ad iqenneɛ imezdaɣ n lwilya ad mmagren s lqewwa tisendiyaq n 09 deg yebrir i d-iteddun, wa d buṭṭin ɣef Bouteflika. Uqebl ad d-yebdu awal ɣef tefranin, yenna-k: “ḥemleɣ ad d-ruḥeɣ ɣer Tubiret :ur tebɛid ara ɣef Bwadnan”. Yejjem uneɣlaf amezwaru taddart-is neɣ d adragi i yettdragi at wexxam? Lḥasun ma tujjma, d lḥeqq-is, ma d adragi, d ayen i t-id-yewwin. Syin akin, yesmekta-d wid as-d-isellen ismawen n kra n yemǧuhad d kra n “'imusnawen”' n temnaḍt. Amecwar yeffeɣ-d si turret-is : “D imaziɣen!”. Ad as-tiniḍ d albaɛḍ n yelmeẓyen n tefsut n yimaziɣen i yeṭṭfn amikru. Tazeqqa tenneqlab s weslilew d tyita n ufus. Iɛawed-as-d i wawal : “nekni d imaziɣen, d inselmen!”. I tikelt tamezwarut i nesla i waya seg yimi n udabu, ɣas ma d lḥemla n lbuṭ. D tidet, ulac ass-a, win ur nesteɛrif ara belli nekni d imaziɣen. Meɛna, ssegran-as-d dima tina “walakin ɛerrabana al islam”. Lmaɛna-s: nekni di lasel d imaziɣen, lislam yerra-aɣ d aɛraben. Ɛni yuɣal-d leɛqel ɣer leɛqel-s? Awi-d kan! Ur yeqqim Ahmed Ouyahia ara kan “n imaziɣen”: ineced-d iman-is ɣer tutlayt au sens linguistique. Yenna-k : “zik wa ihedder-itt i wayeḍ, ass-a d lkaɣeḍ”. Iwehha-d uneɣlaf amezwaru n tegduda ɣer tira n tmaziɣt. Awihhi-agi s wazal-is, imi awal i tizer di tatut, tira tettɣimi i lebda. Atan ihi nura ayen d-yenna Ouyahia, ad d-yeqqim d ttbut i tsutwin d-iteddun.
TOA