Overblog Suivre ce blog
Editer l'article Administration Créer mon blog
22 mars 2009 7 22 /03 /mars /2009 19:04



Asmekti n 19 meɣres
Krim Belkacem“Amennuɣ-is d timunent, tudert-is d tilelli”

 

“Izem n yidurar” akka i as-ssawalen. Isem-agi yekka-d, akken d-qqaren, sɣur yiwen n ljiniral n Fransa; d netta i as-yessawalen akka imi ur zmiren ara ad t-ṭṭfen mi yeffeɣ s amadaɣ seg useggas 1947. Yenɣa yiwen uεessas n lɣaba, dɣa ḥekkmen fell-as s lmut di snat n tikal, deg yiseggasen n 1947 d 1950. Am wakken yella d imḍebber amezwaru n tmurt n leqbayel di PPA-MTLD. Ass n 9 di yunyu 1954, yemlal di Lezzayer tamanaɣt d Ben Boulaid syin akked Boudiaf d Didouche iwakken ad t-qenεen ad d-iwexxer i Messali ad ḍefren abrid wis tlata : abrid n ukerṭuc. S wakka i yuɣal d aεeggal w-6 n tesqamut isedduyen lecɣal n daxel n FLN ; d nutni i yessawlenɣγer lgira : Mohamed Boudiaf, Mostefa Ben Boulaid, Rabah Bitatat, Larbi Ben Mhedi, Mourad Didouche d Krim Belkacem. Di 1962, yemxalaf akked BenBella syin ssbeεden-t fell-asen. Yettwaḥken fell-as s lmut deg yiseggasen 1965, nnan-d yeεreḍ ad ineɣ Boumedièrene.  Am wakken yura daɣen Amar Hamdani deg useggas 1974 yiwen n udlis isemma-as “Izem n yidura” Le lion des djebels, 4 yiseggasen mebεed mi yettwaxneq Krim Belkacem di Francfort di tmurt n Lalman ass 18 tuber 1970 deg yiwen n usensu s tekrabaṭ-is. Krim Belkacem d netta i yellan ɣef uqerru n ugraw iruḥen ɣer yimtawayen n Evian. Ilmend n usmekti w-47 n yimtawen-agi, anda i d-yella ustenyi gar Lezzayer d Fransa ɣef uḥbas n yimenɣi ass n 18 di meɣres 1962 i yebdan s wudem unsib azekka-nni. Γas ulamma ur yettwaqader ara akken ilaq, tidukla tadelsant “imdukal n Krim Belqasem” thegga-d sin n wussan 18 d 19 di meɣres 2009 deg uxxam n yidles Mulud Mεemmri anda i terra tajmilt i umeɣras-agi. Deg wahil n sin n wussan-agi yella: timsikent, isaragen akked tirza ɣer uẓekka-s di Lεelya di Lezzayer tamanaɣt. Wid i ttikkin deg yimtawayen n Evian d wi :Krim Belkacem, Saad Dahlab, Ahmed Boumendjel, Ahmed Francis, Taïeb Boulahrouf, Mohamed Seddik Ben Yahia, Seghir Mostefaï, Redha Malek, Kaïd Ahmed,  Mendjli. Iseggasen-agi ineggura awal yuzzel s waṭas ɣef wassaɣen yellan gar Krim d Abane. Γas ulamma yesdukel-iten wamek ttwanɣan; imi amezwaru yettwaxneqq s yileẓwi, wis sin s tekrabaṭ-is, sduklen, diɣ, tikti akken di tazwara n ṭṭrad; mgaraden deg yiwet n tmuɣli, akken d-nnan wid yuran neɣ wid yecfan. Abane, yessizwir aserti ɣef uεsekri, daɣen win yellan daxel ɣef berra. Llan wid yesseɣzafen deg wawal, fkan isem n “3 n B” i tmenɣiwt n Abane. Tawacult n Abane tenna-d “d wigi i t-yenɣan di Lmerruk ass 27 deg jenber 1957. Acu kan, gar tlata-agi, ala Boussouf i yebɣan lmut-is ; wid-nniḍen bɣan-t di lḥebs. Boussouf yenna-asen ur nezmir ara ad t-nerr ɣer lḥebs acku yewεer. Ihi d lmut-is kan i ilaqen. D netta s timmad-is i t-ixenqen s tekrabaṭ-is, tkemmel tenna tmeṭṭut n Abane. Deg yiwen udlis yura Khalfa Mammeri, Ouamrane yugi timenɣiwt n Abane : «aql-i yid-wen ma ad yettwaḥbes, ma d lmut-is ala.»*. Acu kan Boussouf yella ur yettawi ara Abane deg wul-is. Yexdem rray-is, i d-yenna warrat i yellan ɣer Ouamrane, anda d-iban Krim Belkacem ur yeεmid ara lmut n Abane, am wakken daɣen ur tt-yebɣi ara. Ahat ad d-yaweḍ wass anda ara nesteqsi ayen iεeddan akken tidet ad d-tali,  ad yettwakkes uɣebbar ɣef udlis n umezruy azzayri, ad yettwaqbel akken yella; s wayen yelhan deg-s d wayen n ddir.

 

                                                              Lḥusin Urezqi

Partager cet article

Repost 0

commentaires

Présentation

  • : La confédération des Iflisen Umellil
  • : Un des objectifs est de reconstituer la grande confédération qui regroupait les 14 aarchs des Iflisen Umellil avant la colonisation française. Le but est de rétablir les liens interrompus et de promouvoir la solidarité inter-arche. Nous visons également à consolider les liens entre la diaspora et leur région d'origine. Réecrire l'histoire des Iflisen et préserver leur patrimoine matériel et immatériel .
  • Contact

Recherche

Liens