DDK 09/02/09
Yal asseggas deg waggur n furar, imezda ɣ n tuddar At Sellam d Lmecta deg tɣiwant n Uqbu dukulen akken llan d lufaq i ulqaḍ n uzemmur iwmi qqaren “Azemmur n Sidi Sliman”. Asseggas-agi, ussan n lexmis d lǧemɛa deg waggur-agi, arrac, irgazen d tulawin, imaɣaren d tamɣarin ttekkren zik. Refden yid-sen tiglezyam, timencarin, icalafen d yiɛwinen. Ttawin abrid wa ɣef uḍar, wa ɣef tkerrust, wa ɣef lhica, seg taddart tatrart Colonel Amirouche yettabaɛen taɣiwant n Uqbu ɣer tuddar-nsen tinasliyin At Sellam d Lmecta i d-yezgan deg tɣiwant n Iɣrem akken ad leqḍen azemmur-agi. Deg yal tiɣmert ad tesleḍ i leɛyad n warrac, icewiqqen n temɣarin d wurar n tlawin. Seg libɛid, ad twaliḍ akk tizemrin fell-asent irgazen amzun d ifrax, ddaw-tsent tilawin amzun d iferṭeṭṭa yal yiwet s nnul-is: d ussan n tmeɣra, d ussan izeṭṭen asaɣ yelhan gar yimezdaɣ i ttḥulfun s yiman-nsen amzun d yiwet n twacult.
Ansay-agi yiwen seg yimezdaɣ ur yecfi melmi i d-yella acku d aqbur, ɛeddan fell-as leqrun-aya. Azemmur n Sidi Sliman, deg-s azal n 1500 n tzemrin, yettara-d alma d 3000 n litrat n zzit, aḥric deg-s ssiǧǧiwent i yat taddart, aḥric ɣer berra, aḥric-nniḍen ttaǧǧant i ttbiyita n Sidi Sliman i d-yettilin snat tikal deg useggas.
B. Sadi
